ازاى ابنك يحب الصلاة ويلتزم وما يسبهاش ابدا

السلام عليكم ورحمة الله وبركاته

انا فى البداية عايز اقول لكم ان سبب تفكيرى فى الحل ده لمشكلة كتير مننا فى تعويد ابنه او بنته وهى مشكلة تعويده على الصلاة لان البنى آدم يا جماعة لو ما اترباش على حب الصلاة واتعود عليها وبقت جزء اساسى من تكوينه ممكن بعد كدة يكسل عنها فعلشان كدة هى دى فكرتى

خد ابنك او بنتك وانزلوا اى مكتبة وقوليله هنشترى حاجات نلعب بيها لعبة حلوة اوى واشترى كرتون او ورق رسم ومقص وألوان نوعها كويس كدة او اللى بيحبها ابنك وممكن قص ولزق او اى ابتكار او فكرة تحب تزودها وروحوا البيت قعده جنبك وخليه يناولك وقوليله احنا هنعمل شجرة الصلاة

وفعلا ارسم شجرة حجمها معقول مش صغيرة و لون الجذع يعنى الساق بتاعها ده باللون البنى وطلع منها 30 فرع كل فرع فيه 5 ورقات اللى هما طبعا الخمس صلوات وال30 يوم اللى هما الشهر وممكن تجرب فى اسبوع او زى ما انت عايز وتقوله كل صلاة هتصليها فى ميعادها هتلون انت بنفسك ورقتها بالاخضر ولو عايزه يعمل اى حاجة تانية زى مثلا دعاء كدة حلو وسهل الصبح او يقول اى اذكار خفيفة ترسمله تفاح وبرضو لما يقول الورد الصغنون ده يلون هو التفاحة بنفسه وحمسه بقى قوله شايف انا نفسى الشجرة دى تبقى حلوة مفيش ولا ورقة فيها تبقى فاضية علشان نعلقها فى اوضتك وكل الناس تفرح بيك وبابى يشوفها ويجيبلك هدية حلوة كدة ابنك او بنتك هيفرحوا انهم بيعملوا حاجة حلوة وانتى بتقعدى معاهم 5 مرات ترسموا وتلونوا وده نوع من الترفيه كل الاطفال بتحبه وكمان هيحبوا يحافظوا على الصلاة حتى لو بنية تانية بس معلش ما هم اطفال واحنا عايزين نعودهم

وان شاء الله ربنا يرزقنا كلنا بذرية صالحة تتقى الله وتحفظ فروضه

مـــــع تــــــحـــيــــاتـــــــي

» خلي ابنك يعيش 24 ساعه في رعاية الله ويتعلم حاجات كتيره ويداوم عليها*
» هل تعلم أن الصلاة مفتاح كل خير ؟
» مقطع محمد حسان كيف تتخلص من الشيطان خنزب في الصلاة